Skep van die naam “Rev Jou Toere”
Net buite Beaufort-Wes, op een van ons vele agterpaaie toere, het ons besluit om ons twee se ervaring, kwalifikasies en toerusting saam te gooi en te dans op die ritme van ons eie drom.

Ons vergelyk ons met geen ander toermaatskappy nie, is nie in kompetisie met ander in toerisme nie. Ons glo ons het ons eie “mojo” en daarmee wil ons graag uniek en in ons eie baan bly.

So is die naam “Rev jou Toere” gebore. Tong in die kies en dubbelsinnig. Revolusies van ‘n motor word gemeet op ‘n toermeter. Ons het besluit om die toere se revolusies hoog te druk en die motor(bus) se toere binne riglyne te hou – dus toeriste se toere! Logies ook dat ons slagspreuk dus sê: “Toere sonder brieke – in Afrikaans!”